अमळनेरात ४ ऑक्टोबरला रंगणार काव्यसंध्येची मैफलसुप्रसिद्ध कवयित्री गुंजन पाटील यांची प्रमुख उपस्थिती
अमळनेर (प्रतिनिधी) : तालुक्यातील काव्यरसिकांसाठी रविवार, ४ ऑक्टोबर रोजी काव्यसंध्या मैफिलीचे आयोजन करण्यात आले आहे. सुप्रसिद्ध कवयित्री कु. गुंजन पाटील यांच्या प्रमुख उपस्थितीत रंगणाऱ्या या कार्यक्रमातून हास्य, कविता आणि आनंदाची अनोखी मेजवानी अनुभवता येणार आहे.
सण-उत्सवांच्या काळात सामाजिक सलोखा जपणे, कायदा व सुव्यवस्था राखणे आणि नागरिकांच्या सुरक्षिततेची जबाबदारी पार पाडताना पोलिस प्रशासनावर मोठा ताण येतो. पोलिस अधिकारी व कर्मचाऱ्यांना या धकाधकीच्या कामातून काही क्षण विरंगुळा मिळावा, त्यांचा तणाव दूर होऊन त्यांना आनंदाचे क्षण अनुभवता यावेत, या उद्देशाने या विशेष काव्यसंध्येचे आयोजन करण्यात आले आहे.
शहरातील छत्रपती शिवाजी महाराज नाट्यगृहात सायंकाळी ५ वाजता कार्यक्रमाला सुरुवात होणार आहे. आमदार अनिल पाटील यांच्या हस्ते कार्यक्रमाचे उद्घाटन होणार असून माजी आमदार तथा कृषिभूषण साहेबराव पाटील यांची प्रमुख उपस्थिती लाभणार आहे.
यावेळी लोकनियुक्त नगराध्यक्ष डॉ. परीक्षित बाविस्कर, म. वा. मंडळाचे अध्यक्ष डॉ. अविनाश जोशी, खानदेश शिक्षण मंडळाचे अध्यक्ष नीरज अग्रवाल, लायन्स क्लबचे अध्यक्ष जितेंद्र पारख, अमळनेर शहर व तालुका पत्रकार संघाचे अध्यक्ष चेतन राजपूत आणि पोलिस निरीक्षक दत्तात्रय निकम उपस्थित राहणार आहेत.
सांस्कृतिक परंपरेला उजाळा देण्याचा प्रयत्न
अमळनेर शहर व तालुक्याला समृद्ध सांस्कृतिक परंपरा लाभली आहे. महाराष्ट्राची लोकधारा आणि सांस्कृतिक वारसा जपण्याचे कार्य विक्रांत भास्करराव पाटील यांच्या माध्यमातून सातत्याने केले जात आहे. याच सांस्कृतिक परंपरेला उजाळा देत काव्यरसिकांसह पोलिस अधिकारी व कर्मचाऱ्यांना आनंदाचे क्षण देण्यासाठी या मैफिलीचे आयोजन करण्यात आले आहे.
या कार्यक्रमाचे आयोजन शेतकी संघाचे संचालक विक्रांत पाटील, जयनील फाऊंडेशनचे अध्यक्ष गौतम पाटील, उपाध्यक्ष वरुण पाटील, सामाजिक कार्यकर्ते सुनील भोई, भूषण महाजन, विजय राजपूत, अक्षय साळी, यश वर्मा आणि कवी शरद धनगर यांनी केले आहे.