कर्मकांडाला फाटा; सत्यशोधक विचारांचा जागर! अनोरेत दशपिंड व गंधमुक्ती विधी
धरणगाव प्रतिनिधी : धरणगाव तालुक्यातील अनोरे येथे ज्ञानेश्वर दत्तू महाजन यांचे वडील दिवंगत दत्तू हरी महाजन यांच्या दशपिंड, गंधमुक्ती व उत्तरकार्याचा विधी सत्यशोधक पद्धतीने पार पडला. पारंपरिक कर्मकांडांना फाटा देत महापुरुषांच्या विचारांना केंद्रस्थानी ठेवून हा विधी करण्यात आला.
कार्यक्रमाच्या सुरुवातीला संत, महापुरुष व महामाता यांच्या प्रतिमांचे पूजन करण्यात आले. सत्यशोधक पद्धतीने विधी करताना सत्यशोधक विधीकर्ते शिवदास महाजन यांनी सत्यशोधक समाजाची प्रार्थना सादर करून उपस्थितांचे प्रबोधन केले.
यावेळी सत्यशोधक समाज संघाचे जिल्हाध्यक्ष पी. डी. पाटील म्हणाले, “अंधश्रद्धा व कर्मकांडापासून मुक्त होऊन सत्यशोधक विचारांनी मार्गक्रमण करणे गरजेचे आहे. शिक्षण हे मानवमुक्तीचे प्रभावी साधन आहे. ‘गुलामगिरी’ हा ग्रंथ सत्यशोधक समाजाचा जाहीरनामा आहे. समाजाने अंधश्रद्धा व कर्मकांडापासून मुक्त होण्यासाठी सत्यशोधक पद्धतीने विवाह, दशक्रिया विधी, गृहप्रवेश आदी विधी करावेत.”
तसेच मराठी वारसा या यूट्यूब चॅनेलवरील ‘सावित्रीबाई जोतिराव फुले’ मालिका सहकुटुंब पाहावी, त्यातून महापुरुषांचा खरा इतिहास समजून घ्यावा, असे आवाहनही पाटील यांनी केले.
माळी समाजाध्यक्ष हरी महाजन व सरपंच स्वप्निल महाजन यांनी मनोगत व्यक्त करून दिवंगत दत्तू हरी महाजन यांना भावपूर्ण आदरांजली अर्पण केली. सत्यशोधक विधीची प्रेरणा सत्यशोधक समाज संघाचे अध्यक्ष अरविंद खैरनार व सचिव डॉ. सुरेश झाल्टे यांच्याकडून मिळाल्याचे यावेळी सांगण्यात आले.
कार्यक्रमात उपस्थितांना महापुरुषांचे अनमोल ग्रंथ भेट देण्यात आले. तसेच रोकडे परिवाराच्या वतीने वडिलांच्या स्मृतीप्रित्यर्थ शेत परिसरात लिंब, पिंपळ व वड या वृक्षांचे वृक्षारोपण करण्यात आले. रोकडे परिवाराच्या वतीने सत्यशोधक समाज संघाला ११०० रुपयांचा निधीही सुपूर्त करण्यात आला.
लवकरच अनोरे गावात मोठ्या स्क्रीनवर मराठी वारसा यूट्यूब चॅनेलवरील ‘सावित्रीबाई जोतिराव फुले’ मालिका दाखविण्यात येणार असल्याचे माळी समाजाध्यक्ष हरी महाजन यांनी सांगितले. तसेच अनोरे ग्रामस्थांनी यापुढे सत्यशोधक पद्धतीनेच विधी करावेत, असे आवाहन सरपंच स्वप्निल महाजन यांनी केले.
याप्रसंगी मधुकर नामदेव देशमुख (उपाध्यक्ष, बी. जे. विद्यालय), हरी तुकाराम महाजन (माळी समाजाध्यक्ष), स्वप्निल लक्ष्मण महाजन (सरपंच), भाऊसाहेब संभाजी पाटील (पोलीस पाटील), ज्ञानदेव राजाराम पाटील (विविध कार्यकारी सोसायटी चेअरमन), रवींद्र लोटन चव्हाण, त्र्यंबक रोकडे, रघुनाथ रोकडे, नामदेव रोकडे, सुरेश रोकडे, संतोष रोकडे, राजेंद्र रोकडे यांच्यासह गावातील सामाजिक, शैक्षणिक, पत्रकारिता, क्रीडा, साहित्य, राजकीय क्षेत्रातील मान्यवर तसेच आप्तेष्ट मोठ्या संख्येने उपस्थित होते.