कळमसऱ्यात ‘राम-रहीम गणपती’चा अनोखा उपक्रम; हिंदू-मुस्लिम ऐक्याचे घडविले आदर्श उदाहरण मुस्लिम बांधवांचा पुढाकार; गणपती स्थापनेपासून महाप्रसादापर्यंत उत्साहाने सहभाग
कळमसरे, प्रतिनिधी : अमळनेर तालुक्यातील कळमसरे गावाने हिंदू-मुस्लिम ऐक्य आणि सामाजिक सलोख्याची अनोखी परंपरा जपत एक आदर्श निर्माण केला आहे. गावातील मुस्लिम बांधवांनी पुढाकार घेत गणपतीची स्थापना केली असून, या गणपती मंडळाला ‘राम-रहीम गणपती’ असे नाव देण्यात आले आहे. गणपती स्थापनेपासून वर्गणी संकलन, आरती, धार्मिक कार्यक्रम तसेच महाप्रसादाच्या आयोजनापर्यंत मुस्लिम बांधव उत्स्फूर्तपणे सहभागी होत आहेत.
कळमसरे हे विविध जाती-धर्मांचे नागरिक गुण्यागोविंदाने नांदणारे गाव आहे. येथील मुस्लिम समाज हिंदूंच्या विविध सण-उत्सवांमध्ये उत्साहाने सहभागी होतो, तर मुस्लिम समाजाच्या धार्मिक व सामाजिक कार्यक्रमांमध्येही हिंदू बांधव मोठ्या आनंदाने सहभागी होतात. त्यामुळे गावात सामाजिक एकोपा आणि परस्पर बंधुभावाची भावना दृढ झाली आहे.
पाडळसरे फाट्यावर पठाण कुटुंबीयांचे गॅरेज असून मेहमूद खान, वसीम खान, सलीम खान आणि नईम खान या मुस्लिम बांधवांनी पुढाकार घेत गणपतीची स्थापना केली आहे. त्यांच्या या उपक्रमातून धार्मिक सलोखा आणि ‘सर्व धर्मांचा सन्मान’ हा संदेश समाजापर्यंत पोहोचत आहे.
पठाण कुटुंबीयांचे या परिसराशी जुने संबंध असून, त्यांच्या पूर्वजांपासून सामाजिक बांधिलकीची परंपरा जपली जात असल्याचे सांगितले जाते. हिंदू समाजाच्या विविध कार्यक्रमांमध्ये या कुटुंबाचा नेहमीच पुढाकार असतो. त्याचप्रमाणे मुस्लिम समाजाच्या कार्यक्रमांमध्येही संपूर्ण गावातील हिंदू बांधव सहभागी होत असल्याने कळमसरे गावातील सामाजिक एकतेचे दर्शन घडते.
या कुटुंबातील नव्या पिढीनेही शिक्षणाच्या क्षेत्रात उल्लेखनीय प्रगती केली आहे. कुटुंबातील मुले-मुली उच्च शिक्षण घेत असून, एका विद्यार्थिनीचे औरंगाबाद येथे वकिलीचे शिक्षण सुरू आहे. तर एका कुटुंबातील मुलगी विद्यापीठात एम.एस्सी.चे शिक्षण घेत आहे. कुटुंबातील एक युवक विदेशात नोकरी करीत आहे.
धर्म, जात आणि पंथाच्या भिंती ओलांडून ‘माणुसकी हाच सर्वात मोठा धर्म’ या विचाराला प्रत्यक्ष कृतीतून बळ देणाऱ्या पठाण कुटुंबाच्या या उपक्रमाचे अमळनेर तालुक्यात कौतुक होत आहे. ‘राम-रहीम गणपती’च्या माध्यमातून कळमसरे गावाने एकतेतून समाजाची शक्ती वाढते, असा सुंदर संदेश दिला आहे.