अमळनेरात बिबट्याचा तरुणावर झडप; आरोळ्यांमुळे थोडक्यात बचाव! बोरी नदीकाठच्या साने नगर परिसरातील घटना; वनविभागाकडून दोन पिंजरे व ट्रॅप कॅमेरे लावण्याची तयारी
अमळनेर : शहरातील साने नगर परिसरातील बोरी नदीकाठच्या झुडपांमध्ये बसलेल्या एका तरुणावर बिबट्याने हल्ला केल्याची धक्कादायक घटना समोर आली आहे. बिबट्याने अचानक झडप घातल्यानंतर तरुणाने प्रसंगावधान राखत जोरजोरात आरोळ्या मारल्याने बिबट्याने तेथून धूम ठोकली. त्यामुळे तरुणाचा थोडक्यात बचाव झाला.
मिळालेल्या माहितीनुसार, बोरी नदीकाठच्या परिसरात एक तरुण झुडपांमध्ये बसला असताना अचानक बिबट्याने त्याच्यावर हल्ला करण्याचा प्रयत्न केला. बिबट्याची चाहूल लागताच तरुणाने आरडाओरड केल्याने परिसरात खळबळ उडाली. त्याच्या आरोळ्यांमुळे बिबट्या तेथून निघून गेल्याने मोठा अनर्थ टळला.
घटनेची माहिती मिळताच वनपाल गुलाब पिंजारी, वनरक्षक योगेश पाटील आणि वनरक्षक मनीषा मोरे यांनी तातडीने घटनास्थळी धाव घेत पाहणी केली. या घटनेची माहिती परिसरात वाऱ्यासारखी पसरताच स्थानिक नगरसेवक मुख्तार खाटीक यांच्यासह नागरिकांनीही घटनास्थळी गर्दी केली.
दरम्यान, बिबट्याचा वावर लक्षात घेता वनविभागाने परिसरात दोन पिंजरे तसेच ट्रॅप कॅमेरे लावण्याची तयारी सुरू केली आहे. बिबट्याच्या हालचालींवर लक्ष ठेवण्यासाठी वनविभागाकडून आवश्यक ती खबरदारी घेतली जाणार असल्याची माहिती देण्यात आली.
बोरी नदीकाठच्या झुडपी भागात बिबट्याचा वावर आढळल्याने साने नगर परिसरातील नागरिकांमध्ये भीतीचे वातावरण निर्माण झाले आहे. नदीकाठ, झुडपे तसेच परिसरातील नागरिकांनी विशेषतः रात्रीच्या वेळी सतर्क राहावे, असे आवाहन करण्यात येत आहे.